विराटनगर — समावेशी शासन, महिला सशक्तीकरण तथा दलित मैत्री योजना प्रवर्द्धन गर्ने उद्देश्यसहित कोशी प्रदेशका १४ जिल्लाका दलित महिलाहरूको तीन दिने कार्यशाला सोमबारदेखि विराटनगरमा सुरू भएको छ ।

सामाजिक विकास मन्त्रालयको सहयोगमा दलित महिला संघ (फेडो)ले आयोजना गरेको कार्यक्रममा एक सयभन्दा बढी महिलाको सहभागिता रहेको थियो । जातीय छुवाछूत तथा विभेदविरुद्ध एकजुट भई अधिकार सुनिश्चित गर्ने लक्ष्यसहित कार्यशाला सञ्चालन गरिएको फेडोकी मोरङ अध्यक्ष सर्मिला परियारले जनाइन् । 

कोशी प्रदेशका सामाजिक विकासमन्त्री रामप्रसाद महतोले दलित अधिकार प्राप्तिका लागि माग गर्न र आवश्यक परे संघर्ष गर्नुपर्ने धारणा राखे । 'अधिकार माग्नुपर्छ, नदिए लड्नुपर्छ,' उनले भने । 

कोशी प्रदेशमा निर्माणाधीन दलित सशक्तीकरण विधेयक भने मुख्यमन्त्री हिक्मत कार्की र मन्त्री महतोकै असहयोगका कारण अघि बढ्न नसकेको आरोप दलित अधिकारकर्मीहरूको छ ।