वडाअध्यक्ष राईले भने आफ्नो वडाको योजना भएकाले वडानै आयोजक हुने बताएका थिए । उक्त सालिक कोशी प्रदेश सरकारको ७० र स्थानीय तहको ३० प्रतिशत गरी ११ करोड ४९ लाख २३ हजार १ सय ५४ रूपैयाँको लागतमा निर्माण भएको हो । 

उमा तुवाचुङ अन्सुली जेभीले ११ करोड ५८ लाख १६ हजार ४ सय ४१ रूपैयाँमा १८ महिनाभित्र सक्ने गरी २०७८ असार २८ मा सम्झौता गरेको थियो । तर डिजाइनका कारण बेलामा काम नसकिँदा पटक–पटक म्याद थपिँदै आएको थियो । योजनाको गत वर्ष काम सम्पन्नपछि भुक्तानी समेत भइसकेको दिक्तेल रूपाकोट मझुवागढी नगरपालिकाका सूचना अधिकारी मोहनकुमार भट्टराईले बताएका छन् । 

निर्माण सम्पन्नपछि कोशी प्रदेशका मुख्यमन्त्री हिकमतकुमार कार्कीबाट गत जेठ १८ मै  उद्घाटन गर्ने योजना बनाइए पनि पहिचान पक्षधरहरूले अवरोध गरेका थिए । कोशी प्रदेश नामाङ्कनको पक्षमा हस्ताक्षर गर्ने कोशी प्रदेशका ८२ जना सांसद र पहिचान पक्षधरहरूविरुद्धमा उभिने तत्कालीन प्रधानमन्त्री केपी शर्मा ओली, महेश बस्नेत र योगेश भट्टराई गरी ८५ जनाको हातबाट उद्घाटन गर्न नहुने भन्दै किराँत राई यायोक्खाले दिक्तेल रूपाकोट मझुवागढी नगरपालिकालाई पत्राचार गरेपछि उद्घाटन रोकिएको थियो ।