सुनसरी — पूर्वाञ्चल विश्वविद्यालयको चौधौं दीक्षान्तमा ६ हजार ७ सय ६ जना विद्यार्थी दीक्षित भएका छन् ।

विश्वविद्यालयका सहकुलपति शिक्षा, विज्ञान तथा प्रविधि, युवा तथा खेलकुद मन्त्री सस्मित पोखरेलको अध्यक्षतामा विश्वविद्यालयको केन्द्रीय कार्यालय गोठगाउँ मोरङमा मंगलबार दीक्षान्त भएको हो । 

विश्वविद्यालयका अनुसार विभिन्न संकायअन्तर्गत स्नातक, स्नातकोत्तर तथा एमफिल तहका विद्यार्थीहरू दीक्षित भएका हुन् । स्नातक तहबाट ५ हजार २ सय ८८, स्नातकोत्तरबाट १ हजार ४ सय १३ तथा एमफिलबाट ५ जना विद्यार्थी दीक्षित भएको विश्वविद्यालयले जनाएको छ । 

विश्वविद्यालयका अनुसार सबैभन्दा बढी विद्यार्थी व्यवस्थापन संकायबाट २ हजार २ सय ६४ जना दिक्षित भएका छन् । त्यस्तै, इन्जिनियरिङ संकायबाट १ हजार २ सय ६२, विज्ञान तथा प्रविधि संकायबाट ७ सय ४७, कानुन संकायबाट ६ सय २२ र चिकित्सा तथा सहायक स्वास्थ्य विज्ञानबाट ६ सय २४ जना विद्यार्थी दीक्षित भएका छन् ।