सिरहा — सिरहा नगरपालिकाका नगर प्रमुख नवीनकुमार यादवले एक कर्मचारीलाई कुटपिट गरेका छन् ।नगरपालिकाको कार्यालयमा कार्यरत कार्यालय सहयोगी ५० वर्षीय रामशरण यादवलाई नगर प्रमुख यादवले कुटपिट गरेका हुन् ।

आज बिहान ९ बजे लेखा शाखामा हाजिरी गर्न रजिस्टार पल्टाउँदै गर्दा मेयर यादव अचानक आएर गालीगलौज गर्दै लात र मुक्काले कुटपिट गरेको रामशरणले बताए । उनी नगरपालिकाको स्वास्थ्य शाखामा २४ वर्षदेखि काजमा कार्यरत छन् ।

सिरहा नगरपालिका-१५ सुकचेनाका स्थायी बासिन्दा उनको दरबन्दी भने सिरहा नगरपालिका-२० लगडी गदियानीस्थित स्वास्थ्य चौकीमा छ । नगरपालिकाले विधि प्रक्रिया पुर्‍याएर कर्मचारीलाई जहाँ पनि पठाउन सक्ने बाटो हुँदाहुँदै पनि कुटपिट गर्दै आफूलाई यहाँबाट दरबन्दी भएको ठाउँमा जान भनेको पीडित कार्यालय सहयोगीले बताए ।

'हामी कर्मचारीलाई सरुवा गर्ने अधिकार त उहाँहरूसँग छँदैछ नि, मलाई आधिकारिक रूपमा सरुवा गरेको भए र मैले नमानेको भए एउटा कुरा हुन्थ्यो,' उनले भने, 'तर, म हाजिरी गर्न लागिरहँदा आज अचानक आएर तिमी दरबन्दी भएको ठाउँमा जाउ भन्दै एक्कासी कुटपिट गर्न थाल्नुभयो ।'

उनी अहिले सिरहास्थित प्रादेशिक अस्पतालमा उपचार गराइरहेका छन् । यता मेयर यादवले भने आफूले ती कर्मचारीलाई कुटपिट गरेको कुरा गलत भएको दाबी गरेका छन् । आफूले हाजिरी गर्न रोक्दा उनी आफैं रुन र कराउन थालेको मेयर यादवको दाबी छ ।