विराटनगर — गत चैत ५ गते रातिदेखि ‘बेपत्ता’ भनिएकी ३२ वर्षीया कोमलकुमारी साह मंगलबार साँझ विराटनगर-१७ स्थित एउटा फोहोर बग्ने कल्भर्टमुनि मृत फेला परेकी छिन् । उनको शव सडेको र सल र साडीले हातखुट्टा बाँधिएको अवस्थामा भेटिएको हो । 

विराटनगर-१५ की ३२ कोमल कुमारी हराएको दुई दिनपछि श्रीमान् रोशन साह चैत ७ मा जिल्ला प्रहरी कार्यालय पुग्छन् । तर, उनी प्रहरीलाई अलमल्याउने प्रयास गर्छन् । कहिले तस्बिर ल्याउन भुलेको बहाना गर्छन् त कहिले श्रीमती अन्य पुरुषसँग भागेको हुन सक्ने आशंका । उनको शंकास्पद व्यवहारले प्रहरीलाई सुरुदेखि नै झस्काउँछ । मंगलबार साँझ जब हातखुट्टा बाँधिएको अवस्थामा शव फेला पर्‍यो, चुरा र औंठीका आधारमा कोमलको पहिचान खुल्यो । त्यसको केही बेरमै प्रहरीले रोशनलाई घरबाट नियन्त्रणमा लियो ।