पाथीभरा क्षेत्र विकास समितिका अध्यक्ष रक्की थेवे माथिल्लो फेदीमा अहेवको नेतृत्वमा स्वास्थ्यकर्मी राखिएको र क्षेत्र विकास समितिका कर्मचारीले पनि कोही समस्यामा परे सहयोग गर्ने गरेको बताउँछन् । भविष्यमा यस्ता घटना दोहोरिन नदिन स्वास्थ्य, सुरक्षा तथा आपत्कालीन सेवामा थप प्रभावकारी व्यवस्था गर्ने समितिले जनाएको छ ।

‘हालको मौसम तथा उचाइका कारण हुन सक्ने जोखिमलाई मध्यनजर गर्दै बिरामी, अशक्त, साना बालबालिका र वृद्ध अवस्थामा पुग्नुभएका महानुभावहरूले विशेष सतर्कता अपनाउनुहुन अनुरोध गरिन्छ,’ क्षेत्र विकास समितिद्वारा जारी सूचनामा भनिएको छ, ‘आवश्यक स्वास्थ्य तथा सुरक्षा सम्बन्धी समस्या आए काफ्‌लेपाटी र फेदीमा रहेको प्रहरी पोस्ट तथा फेदी स्थित स्वास्थ्य संस्थामा सम्पर्क गर्नुहुन अनुरोध गरिन्छ।’ 

सोमबार पाथीभरा दर्शनका लागि गएका बालक आफन्तसँग फर्कने क्रममा बिरामी भएका थिए ।श्वासप्रश्वासको समस्या देखिएपछि उनलाई जिल्ला अस्पताल ताप्लेजुङ पुर्‍याइएको थियो । चिकित्सकले अस्पताल पुऱ्याउँदा गम्भीर अवस्थामा पुगेको सन्देश दिएका थिए । अस्पतालमा आधा घण्टा उपचारपछि मृत घोषणा गरिएको प्रहरी निरीक्षक यादवले जानकारी दिए । बालकलाई पहिला पनि निमोनिया हुने गरेको र पाथीभराबाट फर्काइँदा निमोनियाको समस्या देखिएको अस्पताल स्रोतले जनाएको छ ।