खोटाङ — हलेसीमा निर्माणाधीन नगर अस्पताल अलपत्र पार्ने निर्माण कम्पनीको गाडी हलेसी तुवाचुङ नगरपालिकाले नियन्त्रणमा लिएको छ । ठेक्का लिएर काम नगरी अलपत्र पार्ने नमुना हिमालयन जेवी विराटनगर सम्वद्ध रमेश बस्नेत चढेको बागमती प्रदेश १६ च ६८०२ नम्बरको सुजुकी कार आइतबार नियन्त्रणमा लिएको हो ।

कानुनी आधारमा पटक–पटक ताकेता गर्दा समेत नटेरेकाले बोलाएरै नियन्त्रण लिएको हलेसी तुवाचुङ नगरपालिकाकी प्रमुख विमला राईले बताएकी छन् । गाडी नियन्त्रणमा लिएपछि आइतबारै जिल्ला प्रशासन कार्यालय खोटाङलाई लिखित जानकारी समेत गराइएको राईले सुनाइन् । काम नगरेकाले कालो सूचीमा राख्ने जानकारी गराउँदै बोलाएपछि गाडी नियन्त्रणमा लिएर काम गर्नेबारे लिखित प्रतिबद्धता समेत गराइएको नगरप्रमुख राईले जनाएकी छन् ।

उक्त प्रतिबद्धतापत्रमा चैत १२ गतेदेखि काम सुरु गर्ने, त्यसको ४५ दिनभित्र केसमेन्ट कभर स्याब ढलान गर्ने, ६० दिनभित्र फस्टफ्लोर स्याव सक्ने, त्यसपछिको ६० भिनभित्रमा सेकेन्ड फ्लोरको स्याब सम्पन्न गर्ने प्रतिबद्धता गराइएको छ । कामको प्रगति देखिएपछि सम्वन्धित व्यक्तिलाई गाडी जिम्मा लगाउने राईले जनाएकी छन् । ‘कानुनी आधारमै पटक–पटक ताकिता गरियो, नटेरेपछि कालो सूचीमा राख्ने भनेर बोलाएर गाडी नियन्त्रण लिइ काम गर्ने बारे करारनामा गराइएको छ,’ राईले भनिन्, 'प्रगति देखिएपछि गाडी जिम्मा लगाउने सहमति भएको छ ।’

उक्त निर्माण कम्पनीले २०८० साउन ७ गतेसम्म सक्ने गरी २०७८ साउन ७ गते सम्झौता गरेको थियो । संघीय सरकारको ११ करोड ९९ लाख १९ हजार ६ सय २९ रूपैयाा (भ्याट बाहेक) बजेटको उक्त अस्पताल भवनको तत्कालीन प्रधानमन्त्री केपी शर्मा ओलीले देशभरका ३ सय ९६ वटा अस्पताल भवन एकसाथ शिलान्यास गरेको हलेसी तुवाचुङ नगरपालिकाका प्रवक्ता कमल गिरीले बताएका छन् ।

उक्त भवन बेलामा नबनेपछि पटक–पटक निर्माणअवधि थपिदै आएको छ । पछिल्लो अवधिमा २०८२ असार २९ गतेको कार्यपालिकाको बैठकले तेश्रो पटक २०८३ साउन ७ गतेसम्मका लागि म्याद थप गरेको छ । उक्त भवनको बेसको पिलर मात्र उठाएको छ ।