काठमाडौँ — एयर डाइनेस्टीको हेलिकोप्टर दुर्घटनामा घाइते पाइलट सविन थापा डिस्चार्ज भएका छन् । कम्पनीका प्रवक्ता बालकृष्ण पण्डितका अनुसार, पाइलट थापालाई कुनै घाउचोट नदेखिएपछि ह्याम्स अस्पतालका चिकित्सकले बुधबार साँझ नै घर पठाएका हुन् ।

दुर्घटनामा घाइते भएका ७४ वर्षीय काजीबहादुर राईको ह्याम्समा उपचार भइरहेको छ । प्रवक्ता पण्डितका अनुसार उनको अवस्था सामान्य रहेको छ ।

बुधबार भएको उक्त चार्टर उडान एक महिनाअघि नै बुकिङ गरिएको थियो । बेलायतमा निधन भएकी ८० वर्षीया मनलक्ष्मी राईको शव (कफिन) नेपाल ल्याई खोटाङ लैजानका लागि हेलिकोप्टर चार्टर गरिएको थियो । तर 'एएस३५० एफएक्स-टू' हेलिकोप्टरमा कफिन लोड गर्न नसकिने भएपछि चार्टर गर्ने पक्षले शवलाई बुधबार सडकबाट पठाउने निर्णय गरेको थियो ।

हेलिकोप्टरमा भने मृतकका ८२ वर्षीय पति डाकमणि राई, ५३ वर्षीय छोरा बालकुमार राई, ४७ वर्षीया छोरी लक्ष्मी राई, ४० वर्षीया आफन्त समला राई र ललितपुरका काजीबहादुर राई सवार थिए ।

एयर डाइनेस्टीका अनुसार दुर्घटनाको प्रारम्भिक कारण 'अवतरणपछि उत्पन्न असन्तुलन'  हुन सक्ने अनुमान गरिएको छ । उक्त चार्टर उडान राई परिवारले एकतर्फी ३ लाख २० हजार रुपैयाँमा गरेका थिए । हेलिकोप्टरको तालिकाअनुसार खोटाङबाट सोही दिन रित्तै लुक्ला फर्किने योजना थियो । यस दुर्घटना एयर डाइनेस्टीको पाँचौं हेलिकोप्टर हो ।

एयर डाइनेस्टी हेलिकोप्टर प्रालि सन् १९९३ मा काठमाडौंमा आङ छिरिङ शेर्पाद्वारा स्थापना गरिएको निजी हेलिकोप्टर सेवा प्रदायक कम्पनी हो । उनले पछि यति एयरलायन्स पनि स्थापना गरेका थिए ।