धनकुटा — जिल्लाको सहिदभूमि गाउँपालिकास्थित थलथले बजारमा बिहीबार अनुगमन गरिँदा म्याद गुज्रिएका खाद्यान्न सामग्री फेला परेपछि जफत गरी नष्ट गरिएको छ । बजार क्षेत्रका किराना तथा खुद्रा पसलको अनुगमन गरी म्याद गुज्रिएका खाद्यान्न जफत गरी नष्ट गरिएको हो ।

बजार अनुगमन घरेलु तथा साना उद्योग कार्यालयको अयोजनामा जिल्ला प्रशासन कार्यालय धनकुटा, उद्योग वाणिज्य संघ, कर कार्यालय, खाद्य प्रविधि तथा गुण नियन्त्रण डिभिजन कार्यालय र राष्ट्रिय उपभोक्ता मञ्चले संयुक्त रूपमा गरेका हुन् । 

खाद्य प्रविधि तथा गुण नियन्त्रण डिभिजन कार्यालयका खाद्य निरीक्षण अधिकारी सुशील कोइरालाका अनुसार म्याद गुज्रिएका खाद्यान्न तथा पेय पदार्थ उत्पादन मितिका साथै उपभोग्य मिति र म्याद नराखिएको भेटिएको छ । यस्तै घरेलु तथा साना उद्योगको कार्यालयका सूचना अधिकारी विकास कार्कीका अनुसार कतिपय पसलमा मूल्य सूची टाँस नगरिएको र राख्न आग्रह गरिएको बताए ।