मोटरसाइकल अनियन्त्रित भई सखुवाको रुपमा ठोक्किँदा दुर्घटना भएको हो ।
काठमाडौँ — मदन भण्डारी लोकमार्गअन्तर्गत गाईघाट–बेल्टार सडकखण्डको चौदण्डीगढी नगरपालिका-१० भिमामा मोटरसाइकल दुर्घटनामा एक जनाको मृत्यु भएको छ भने दुईजना गम्भीर घाइते भएका छन् ।
गाईघाटबाट बेल्टारतर्फ जाँदै गरेको प्र.०१–०५–००२ प १८२७ नम्बरको मोटरसाइकल अनियन्त्रित भई दुर्घटना भएको प्रहरीले जनाएको छ ।
मोटरसाइकल सडकको उत्तरतर्फको सखुवाको रुपमा ठोक्किएको थियो । चालक चौदण्डीगढी-५ सिवाईका १८ वर्षीय समीर चौधरीको गम्भीर घाइते भएकामा अस्पताल पुर्याउनसाथ चिकित्सकले मृत घोषणा गरे ।
मोटरसाइकल पछाडि सवार दुईजना सोही ठाउँका १८ वर्षीय मौसम चौधरी र २३ वर्षीय अशोक चौधरी गम्भीर घाइते भएका हुन् । उनीहरुको थप उपचारका लागि विराटनगर रेफर गरिएको प्रहरीले जनाएको छ ।
इलाका प्रहरी कार्यालय बेल्टारबाट खटिएको प्रहरी टोलीले घटनाको प्रकृति मुचुल्का उठाई थप अनुसन्धान गरिरहेको छ ।
