धरान — उज्यालो नेपाल पार्टीका अध्यक्ष तथा पूर्वमन्त्री कुलमान घिसिङले देश अहिले ‘राजनीतिक लोडसेडिङ’ र अँध्यारोको अवस्थामा रहेको बताएका छन् ।

धरान उपमहानगरपालिकामा आयोजित चुनावी आमसभालाई सम्बोधन गर्दै उनले देशको विविध लोडसेडिङलाई अन्त्य गर्न र हरेक जनताको मुहारमा उज्यालो ल्याउन र देशलाई समृद्धि तथा आर्थिक रूपान्तरणतर्फ अघि बढाउन उज्यालो नेपाल पार्टीको स्थापना भएको उनले बताए।

‘हाम्रो पार्टी तीन महिनामा दर्ता भएर बीचमा केही समय अलमल भए पनि हामी फेरि उठेर सशक्त रूपमा अघि आएको छौं,' उनले भने, 'उज्यालो नेपाल पार्टीले देशमा बत्ती ल्याएर आएको छ। यो बत्ती अब कहिल्यै निभ्ने छेैन र निभ्न नदिन तपाईंहरूले साथ दिनु आवश्यक छ।’

घिसिङले आफ्नो नेतृत्वमा ऊर्जा क्षेत्रमा देखिएको सुधारलाई उदाहरण दिँदै विगतमा लोडसेडिङ हटाएको, विद्युत् वितरण विस्तार गरेको, व्यवस्थापन सुधार गरेको र नेपाल विद्युत् प्राधिकरणलाई घाटाबाट नाफामा पुर्‍याएर भारत र बङ्गलादेशमा विद्युत् निर्यात गर्न सफल भएको स्मरण गराए। उनले भने, ‘देशमा केवल विद्युत् होइन, सम्पूर्ण प्रणालीमै लोडसेडिङ छ। त्यो अँध्यारोलाई हटाउन र जीवन उज्यालो बनाउन उज्यालो नेपाल पार्टी मात्र सक्षम छ।’