खोटाङ — साकेला गाउँपालिका-४ मानेभन्ज्याङस्थित सामुदायिक भवनमा आगलागी भएको छ । बुधबार बिहान करिब साढे ६ बजेतिर आगजनी भएको हो ।

साकेला गाउँपालिकाका प्रमुख प्रशासकीय अधिकृत दुर्गाबहादुर राईका अनुसार ३ करोड १५ लाख ३६ हजार क्षति भएको छ । 

गाउँपालिकाको करिब ४ करोडको लगानीमा निर्माणाधीन अवस्थामै आगजनी भएको राईले सुनाएका छन् । ‘आज बिहान साढे ६ बजेतिर आगलागी हुँ दा ठूलो क्षति भएको छ,’ राईले भने, ‘गाउँपालिकाको करिब ४ करोडको लगानीमा निर्माणाधीन सामुदायिक भवनमा आगलागी हुँदा ३ करोड १५ लाख ३६ हजारबराबरको क्षति भएको मुचुल्का उठेको छ ।’

उक्त भवन निर्माणाधीन अवस्थामै रहे पनि आवासका रूपमा उपयोग हुँदै आएको थियो । तीन तलासम्म ढलान सकिएको उक्त भवनमा गाउँपालिका उपाध्यक्ष बिर्सिका राई, लेखापाल उत्तम आचार्य र सूचना अधिकारी डीएम चाम्लिङको आवास रहेको सूचना अधिकारी चाम्लिङले बताएका छन् ।