ताप्लेजुङ — फागुन २१ गते हुने प्रतिनिधिसभा निर्वाचनका लागि महिला र स्वतन्त्र उम्मेदवार शून्य रहेको हिमाली जिल्ला ताप्लेजुङमा ३८ देखि ६६ वर्ष उमेर समूहका व्यक्ति चुनावी मैदानमा उत्रिएका छन् । १३ दलका १३ जनाले उम्मेदवारी दर्ता गराएका हुन् ।

निर्वाचन आयोगको कार्यालय ताप्लेजुङमा उम्मेदवारी दर्ता गराएका मध्ये सबैभन्दा कम उमेरका कान्छा उम्मेदवार नेकपा एमालेका क्षितिज थेबे छन् । उनी ३८ वर्षका छन् । एमाले भ्रातृ संगठन राष्ट्रिय युवा संघका केन्द्रीय अध्यक्ष थेबे पहिलो पटक संसदीय राजनीतिमा प्रवेश गरेका हुन् । थेबे सिरिजङ्गा गाउँपालिका–१ सिनाममा जन्मिएका हुन् ।

सबैभन्दा बढी उमेरका भने संघीय समाजवादी पार्टी नेपालका सूर्य गुरुङ छन् । फुङलिङ नगरपालिका–२ बोझेका उनी ६६ वर्षका छन् । चुनावी प्रतिस्पर्धामा सिरिजङ्गा–७ खेवाङका ४६ वर्षीय गजेन्द्रप्रसाद तुम्याहाङ नेपाली कांग्रेसबाट, सिरिजङ्गा–४ पेदाङका ५० वर्षीय खेलप्रसाद बुढाक्षेत्री नेपाली कम्युनिस्ट पार्टीबाट, सिरिजङ्गा–१ सिनामका ५५ वर्षीय वीरेन्द्र श्रेष्ठ राष्ट्रिय स्वतन्त्र पार्टीबाट उम्मेदवार छन् ।