पाँचथर — सशस्त्र प्रहरीको पाँचथरस्थित हिम शिखर गुल्मले फिदिम–१० का एक विपन्न परिवारका लागि घर निर्माण गरेर हस्तान्तरण गरेको छ ।

सशस्त्र प्रहरी बलले संगठनको २५ औं स्थापना दिवसको सन्दर्भ पारेर स्थानीय पूर्णकुमार र सम्झना आङबो दम्पतीको घर निर्माण गरेर हस्तान्तरण गरेको हो । आङबो दम्पतीका ३ जना छोराछोरी छन् । उनीहरु सबै सिद्धदेवी आधारभूत विद्यालय थाङनापामा अध्ययन गर्छन् । 

ती छोराछोरीका साथ घामपानी समेत नतर्किने सानो कटेरोमा बसिरहेको आङबो परिवारको दयनीय अवस्था देखेर उनीहरूकी छिमेकी तथा थाङनापाकी शिक्षिका रिता तुम्बापोले घर निर्माणका लागि सार्वजनिक रुपमा आह्वान गरेकी थिइन् । तुम्बापोको आह्वानपश्चात् जनसेवा समाजको समन्वयमा आङबो परिवारका लागि ढुङ्गा, माटो, टिन र काठ प्रयोग गरेर चिटिक्क परेको २ कोठे घर निर्माण गरिएको हो ।