पाँचथर — छिमेकी ६० वर्षीया विष्णुमाया रसाइलीलाई जंगलमा लगेर मरणासन्न हुने गरी कुटपिट गरी सुन लुटेर फरार पाँचथर याङवरक–५ की धनमाया सेलिङ पक्राउ परेकी छिन् ।

उनलाई पाँचथर प्रहरीले सिक्किम र पश्चिम बंगालको सीमावर्ती नजिक फालेलुङ–४ चित्रे भन्ने स्थानबाट पक्राउ गरेको जिल्ला प्रहरी कार्यालय पाँचथरले जनाएको छ ।

सेलिङले शनिबार अपराह्न रसाइलीलाई ‘जंगलमा कालिजको गुँड देखेकी छु बच्चा समात्न जाऊँ’ भनेर नजिकैको अम्रिसो बारीमा लगेर बेहोस हुने गरी कुटपिट गरी गहना लुटेर फरार भएको घटना सार्वजनिक भएको थियो । रसाइलीको होस खुलेपश्चात् आफन्तको सम्पर्कमा आएर घटनाबारे बताएसँगै प्रहरीले पीडकको खोजी गर्न थालेको थियो ।

दुई दिनको खोजीपश्चात् सेलिङलाई पक्राउ गर्न सफल भएको पाँचथर प्रहरीले जनाएको छ । सुन लुट्नुपूर्व बेहोस हुने गरी कुटपिट गरिएकी रसाइलीको झापाको विर्तामोडस्थित बीएण्डसी अस्पतालमा उपचार भइरहेको छ भने सेलिङलाई जिल्ला प्रहरी कार्यालय फिदिमको हिरासतमा राखेर अनुसन्धान सुरु गरिएको छ ।