सुनसरी — देवानगञ्ज र गढी गाउँपालिकाका आत्मनिर्भर समूह र वडास्तरीय महिला सञ्जालका सदस्यहरूको क्षमता विकासका लागि संचालन गरिएको दुइ दिने तालिम सम्पन्न भएको छ ।

भ्वाइस अफ चिल्ड्रेन इटहरीको सहजीकरण र केएनएच जर्मनीको सहयोगमा सञ्चालन भएको कार्यक्रममा आत्मनिर्भर समूहका महिलाहरूको क्षमता अभिवृद्धि गर्न उद्देश्यसहित पुस १० र ११ गते दुई दिने कार्यक्रम संचालन गरिएको हो ।

देवानगञ्ज र गढी गाउँपालिकामा आर्थिक, सामाजिक र राजनीतिक रूपमा पछाडि परेका तथा जोखिमपूर्ण समुदायका महिलाको सशक्तीकरण  र बालबालिकाको बालसंरक्षणका लागि गुणस्तरीय शिक्षा, स्वास्थ्य, पोषण लगायत समग्र बालअधिकारसम्बन्धी तालिम दिएको भ्वाइस अफ चिल्ड्र्नेका उपनिर्देशक राजु घिमिरेले जानकारी दिए ।

उनका अनुसार देवानगञ्ज तथा गढी गाउँपालिकामा १०१ वटा अत्मनिर्भर समूह गठन भएका छन् ।  ती समूहबाट १६ सयभन्दा बढी महिला संगठित भएका छन् र उनीहरू साप्ताहिक रूपमा बैठक बसी आफ्ना योजना बनाउने, स्थानीय सरकारसँग समन्वय गर्ने र महिला अधिकार तथा बालअधिकारबारे समुदायमा चेतना फैलाउने कार्यक्रम गर्दै आएको भ्वाइस अफ चिल्ड्र्नेका उपनिर्देशक घिमिरेले बताए ।