संखुवासभा — संखुवासभाको खाँदबारी नगरपालिका–९ तुम्लिङटारस्थित कोशी राजमार्गमा दुई मोटरसाइकल आपसमा ठोक्किँदा एकजनाको मृत्यु भएको छ भने दुई जना घाइते भएका छन् ।

उपचारकै क्रममा धनबहादुर सुनारको मृत्यु भएको अस्पतालका चिकित्सकले जानकारी दिएका छन् ।

सभाखोलाबाट तुम्लिङटारतर्फ आउँदै गरेको मोटरसाइकल र विपरीत दिशाबाट जाँदै गरेको प्र १–०२–०४३ प २२७७ नम्बरको मोटरसाइकल शनिबार साढे ६ बजेतिर एकआपसमा ठोक्किएको जिल्ला ट्राफिक प्रहरी कार्यालय संखुवासभाले जनाएको छ । दुर्घटनामा को १८ प ७१७६ नम्बरको मोटरसाइकल चालक खाँदबारी–९ तुम्लिङटार बस्ने अन्दाजी ४८ वर्षीय चक्रबहादुर सुनारको बायाँ हात, बायाँ खुट्टा र चिउँडोमा सामान्य चोट लागेको छ । सोही मोटरसाइकलको पछाडि सवार अन्दाजी ४५ वर्षीय गम्भीर घाइते धनबहादुर सुनारको मृत्यु भएको हो ।