संखुवासभा — भोटखोला गाउँपालिकामा निर्माणाधीन ४ सय ५४ मेगावाट क्षमताको किमाथांका जलविद्युत आयोजनामा जिल्लाका १० वटै स्थानीय तहले संस्थापक शेयरमा लगानी गर्ने सहमति जनाएका छन् ।

सोमबार खाँदबारीमा विद्युत उत्पादन कम्पनी लिमिटेडले आयोजना गरेको छलफल कार्यक्रममा सहभागी स्थानीय तहका जनप्रतिनिधिहरूले आआफ्नो स्थानीय तहमा परेको शेयर बराबरको लगानी गर्न तयार रहेको बताएका हुन् ।

छलफलमा आयोजनाका निमित्त प्रमुख कार्यकारी अधिकृत हिरामान वाइबाले किमाथांका जलविद्युत आयोजना ४ सय ५४ मेगावाट क्षमताको ठूला आयोजनामध्ये एक भएको जानकारी दिए । हालसम्म विस्तृत सम्भाव्यता अध्ययन र इन्जिनियरिङ अध्ययन सम्पन्न भइसकेको उनले बताए । यो आयोजना 'जनताको जलविद्युत आयोजना' का रूपमा विकास गरिने उनले उल्लेख गरे । 'आयोजनामा ५१ प्रतिशत लगानी नेपाल सरकारको र ४९ प्रतिशत लगानी सर्वसाधारण जनताको रहनेछ,' उनले भने, 'स्थानीय सहभागिता र स्वामित्वलाई सुनिश्चित गर्नेछ।' 

संखुवासभाका १० वटै स्थानीय तहको लगानीबारे छलफल भएको भन्दै आयोजना प्रोजेक्ट मेनेजर अशोक पण्डितले निर्माण सुरु भएको मितिबाट पाँच वर्षभित्र विद्युत उत्पादन सुरु गर्ने लक्ष्य लिइएको बताए । उनले तोकिएको समयमै आयोजना सम्पन्न गर्नका लागि सबै सरोकारवाला बीच समन्वय आवश्यक रहेकोमा जोड दिए ।

छलफलमा जिल्ला समन्वय समिति प्रमुख सुमन शाक्यले यति ठूलो र रणनीतिक महत्वको आयोजना भएकाले समयमै निर्माण सम्पन्न हुने गरी काम अघि बढाउनुपर्ने बताए । उनले स्थानीय तह, कम्पनी र केन्द्र सरकार बीचको सहकार्यले मात्र आयोजना सफल हुने विश्वास व्यक्त गरे।

किमाथांका जलविद्युत आयोजना अर्ध–जलाशय प्रकृतिको आयोजना हो । प्रारम्भिक डिजाइन अनुसार छुम्सुर गाउँनजिक अरुण नदीमा करिब १ सय ४० मिटर अग्लो बाँध निर्माण गरिनेछ। उक्त बाँधका कारण अरुण नदीमा करिब ०.३५० वर्ग किलोमिटर क्षेत्रफलमा फैलिएको, १०३ लाख घनमिटर पानी अट्ने क्षमताको जलाशय बन्नेछ ।