संखुवासभा — संखुवासभाको मादी नगरपालिकामा श्रीमान् ले आफ्नै श्रीमतीको हत्या गरी शव गाडेको घटना प्रहरीले सार्वजनिक गरेको छ। मादी नगरपालिका–३ का  ४९ वर्षीय प्रेम दोर्ची शेर्पालाई पक्राउ गरेपछि श्रीमतीको हत्या गरेको खुलेको हो। उनलाई प्रहरीले कर्तव्य ज्यान मुद्दामा अनुसन्धान अघि बढाएको छ।

प्रहरीका अनुसार मिति मंसिर ९ गते राति करिब साढे १० बजे ओखरबोटे बजारबाट घर फर्कने क्रममा प्रेम दोर्ची शेर्पा र उनकी ३७ वर्षीया श्रीमती मीना शेर्पाबीच सामान्य विषयमा विवाद भएको थियो। विवाद बढ्दै जाँदा बाटोमै कुटपिट गरी श्रीमतीको हत्या गरेको दोर्चीले स्वीकार गरेका छन्।

हत्यापश्चात सोही रात मादी नगरपालिका–३ स्थित आफ्नै अलैँची बारीमा खाडल खनी त्रिपालमा बेरेर शव गाडेको बयान प्रहरीसमक्ष दिएका छन्।