विराटनगर — कोशी प्रदेशमा यो वर्ष धान उत्पादन घटेको छ । अघिल्लो वर्षको तुलनामा करिव २० हजार मेट्रिक टन उत्पादन घटेको हो ।

प्रदेश कृषि निर्देशनालयका अनुसार गत वर्ष प्रदेशभर ११ लाख २२ हजार २२१ मेट्रिक मेट्रिक टन धान उत्पादन भएको थियो । यो वर्ष उत्पादन घटेर ११ लाख २ हजार ९४९ मेट्रिक टन मा पुगेको छ । 'उत्पादनमा आएको यो कमी करिब १९ हजार २७२ मेट्रिक टन बराबर हो', निर्देशनालयकी सूचना अधिकारी पूर्णमाया गुरुङले भनिन् ।

कृषि विज्ञहरूका अनुसार रोपाइँका बेला खडेरी र काट्ने बेलामा अत्याधिक वर्षा हुँदा उत्पादनमा गिरावट आएको हो । साथै कीराको प्रकोप र केही क्षेत्रमा धानबाली छोडेर देखिएको वैकल्पिक रोजाइले उत्पादकत्वमा असर पारेको हो ।

उत्पादनसँगै खेतीयोग्य क्षेत्र पनि थोरै घटेको निर्देशनालयले जनाएको छ । गत वर्ष २ लाख ७५ हजार २ सय ६८ हेक्टर क्षेत्रमा धान खेती भएको थियो । यो वर्ष २ लाख ६९ हजार ६ सय ८४ हेक्टरमा  खेती भएको हो ।

कृषि कार्यालयहरूका अनुसार धान उत्पादनको राजधानी मानिने मोरङ, झापा र सुनसरीमै धान उत्पादन घटेको छ । जसका कारण कोशीको कुल उत्पादनमै असर परेको छ ।