सोलुखुम्बु — स्थानीय भाषा र संस्कृतिको संरक्षण र प्रवर्द्धन गर्नेगरी नेपाल प्रज्ञा प्रतिष्ठान र थुलुङ दुधकोशी गाउँपालिकाबीच समझदारी भएको छ ।

गाउँपालिकामा स्थानीय सरकार र प्रज्ञा प्रतिष्ठानबीच भएको विमर्श कार्यक्रममा स्थानीय भाषा र कलाको संरक्षणमा सामूहिक कदम चाल्ने सझदारी भएको हो । 

प्रतिष्ठानका कुलपति भूपाल राई र पालिका अध्यक्ष असिम राईबीच स्थानीय भाषा, साहित्य र कलाको संरक्षण गर्दै प्रवर्द्धन गर्नका लागि ठोस कार्यक्रम अगाडि सार्ने सहमति भएको हो ।

थुलुङ दुधकोशी प्रज्ञा प्रतिष्ठानको समन्वय र गाउँपालिकाको आयोजनामा भएको विमर्श कार्यक्रममा कुलपति राईले देशभरि ५२ वटा स्थानीय तहमा मात्रै प्रज्ञा प्रतिष्ठान गठन भएको भन्दै देशभरिका अन्य स्थानीय तहले कलाको क्षेत्रमा लगानी नगर्नु दु:खद् भएको बताए । ‘हाम्रो लक्ष्य देशभरिका स्थानीय तहमा हाम्रो गतिविधिलाई विस्तार गर्ने हो तर अधिकांश तहले भाषा, कला र संस्कृतिलाई प्राथमिकता दिएका छैनन्,’ कुलपति राईले भने । 

कार्यक्रममा पालिका अध्यक्ष राईले भौतिक विकास मात्रै नभएर सामाजिक विकासमा पनि सँगसँगै अगाडि बढेको धारणा राखे । उनले जिल्लामै पहिलो पटक प्रज्ञा प्रतिष्ठान गठन गरेर साहित्यिक गतिविधि सञ्चालन गरिरहेको बताए ।