दुर्घटनामा गम्भीर घाइते भएका चालककाे बिपी कोइराला स्वास्थ्य विज्ञान प्रतिष्ठानमा मृत्यु भएकाे हाे ।
धरान — धरानमा शुक्रबार बिहान मोटरसाइकल दुर्घटना हुँदा एक जनाको मृत्यु भएको छ ।
कोशी राजमार्ग अन्तरगत धरान उपमहानगरपालिका–८ तिनकुनेमा धरानबाट इटहरीतर्फ जाँदै गरेको प्र १–०३–००१ प १३२४ नम्बरको मोटरसाइकलले प्र १–०२–००१ ख ८७५७ नम्बरको किनारमा रोकिराखेकाे ट्रकलाई पछाडिबाट ठक्कर दिँदा दुर्घटना भएको हो ।
प्रहरीका अनुसार दुर्घटनामा मोटरसाइकल चालक र सवार दुवै जना गम्भीर घाइते भएका थिए । दुवै जनालाई प्रहरीले उद्धार गरी उपचारका लागि बिपी कोइराला स्वास्थ्य विज्ञान प्रतिष्ठान पठाइएको थियो ।
उपचारको क्रममा एक जनाको मृत्यु भएको इलाका प्रहरी कार्यालय धरानका प्रमुख डीएसपी भीषणबाबू राईले बताए ।
मृत्यु हुनेमा इटहरी उपमहानगरपालिका–४ बस्ने मोटरसाइकल चालक २५ वर्षीय मन्जिल लिम्बू रहेको डिएसपी राईले बताए । मोटरसाइकलमा पछाडि सवार इटहरी–५ बस्ने ३२ वर्षीय अमित राईको उपचार भइरहेकाे छ ।
ट्रकचालक तेह्रथुम फेदाप बस्ने २७ वर्षीय गणेश भण्डारीलाई प्रहरीले नियन्त्रणमा लिएको जनाएको छ । मृतक मोटरसाइकल चालक लिम्बूको शव बिपी प्रतिष्ठानको शवगृहमा राखिएको प्रहरीले जनाएको छ ।
