खोटाङ — खोटाङ–दिक्तेल रूपाकोट मझुवागढी नगरपालिका–६ नेर्पामा दुई वर्षअघि निर्माण सुरु गरिएको फलफूल प्रशोधन केन्द्र अझै सञ्चालनमा आएको छैन ।

किवी लगायतका विभिन्न फलफूल प्रशोधन गर्ने उद्देश्यले २०८०/८१ मा थालिएको प्रशोधन केन्द्र अझै सञ्चालनमा आउन नसकेको हो । केन्द्रका लागि संघीय सरकारको ५० लाख समपूरक अनुदान र नगरपालिकाको ५० लाख गरी एक करोड बजेट मध्ये ८४ लाख १२ हजार पाँच सय ९७ रूपैयाँमा २०८०/८१ मा भवनको ठेक्का लागेको थियो । उक्त भवन सुदेवी कन्स्ट्रक्सन प्रालिले निर्माण गरी बुझाइसकेको छ । गत आर्थिक वर्ष पनि प्रदेश सरकारको २० लाख रूपैयाँ बजेटबाट भवनको संरचनामै खर्च भएको थियो । उक्त कामको ठेक्का एसआर कन्ट्रक्सनले लिएको थियो ।