विराटनगर — प्रतिनिधिसभाका सभामुख देवराज घिमिरे कोशी प्रदेशसभाको नयाँ कार्यालय भवन निरीक्षण तथा प्रदेश सभासँग सम्बन्धित विषयमा आवश्यक समन्वय गर्न सोमबार विराटनगर आउँदै छन् ।

जेन-जी आन्दोलनका कारण पूर्ण रुपमा ध्वस्त प्रदेश सभा कटहरी गाउँपालिकाको तरकारी बजार क्षेत्रमा सारिएको छ । संघीय संसद् सचिवालयका अधिकृत प्रविन राईद्वारा जारी सूचनामा सभामुख घिमिरे सोमबार दिउँसो साढे ३ बजे विमानमार्फत विराटनगर ओर्लिनेछन् । 

सभामुखले सोमबारै कोशी प्रदेश सभा कार्यालयको स्थल निरीक्षण गर्ने कार्यक्रम तय भएको सचिवालयले जनाएको छ।

सम्बन्धित समाचार : पहिले तरकारी बजार, अब प्रदेश सभा [तस्बिरहरू]

उक्त भ्रमणका क्रममा सभामुखले प्रदेशसभा भवन, सचिवालयको संरचना तथा व्यवस्थापनसम्बन्धी विषयमा सम्बन्धित अधिकारीसँग छलफल गर्ने कार्यक्रम रहेको जनाएको छ। उनी मंगलवार बिहान काठमाडौं फर्किनेछन् ।