संखुवासभा — काेशी प्रदेशमा ४२ हिमताल उच्च जाेखिममा रहेकाे तथ्यांक इसिमाेडले सार्वजनिक गरेकाे छ ।

नेपालका हिमनदी र हिमतालकाे तीव्र परिवर्तनसँगै उत्पन्न भयानक जाेखिमबारे खाँदबारीमा शुकरबार आयोजित अन्तरसंवाद कार्यक्रममा इसिमाेडका शरदप्रसाद जोशीले २०२० काे रिपोर्ट प्रस्तुत गरे । 'नेपालमा २०६९ हिमताल भएको र तीमध्ये कोशीमा मात्र ४२ वटा अत्यन्तै जाेखिमयुक्त अवस्थामा छन्,' उनले भने । हिमताल फुटेमा ठूलो जनधन र पूर्वाधारमा विनाश निम्त्याउन सक्ने उनले चेतावनी दिए ।

उनका अनुसार संखुवासभामा भोटखोला क्षेत्रमा २ र मकालु क्षेत्रमा २ वटा गरी ४ हिमताल उच्च जोखिमयुक्त छन् । तीमध्ये तल्लो वरुणमा रहेको ठूलोपोखरी हिमताल उच्च जोखिममा भएको उनले बताए । 'करिब ३ किलोमिटर लम्बाइ र २ सय ६ मिटर गहिराइ भएको अनुमान छ,' उनले भने, 'यो तालका छेउछाउमा पनि १५ देखि २५ मिटर गहिराइ छ ।'

जोखिम बढ्दै गएपछि जल तथा मौसम विज्ञान विभाग र यूएनडीपी नेपालको सहकार्यमा ४ हिमतालका लागि जोखिम न्यूनीकरण योजना कार्यान्वयनमा अघि बढिरहेको उनले बताए । ठूलोपोखरी (तल्लो बरूण) पनि सो योजनामा समावेश छ।