पाँचथर — जिल्ला निर्वाचन कार्यालय पाँचथर कार्यालय प्रमुखविहीन बनेको छ । निर्वाचन आयोगले मतदाता नामावली संकलन जारी राखे पनि प्रमुखसँगै निमित्त प्रमुख नहुँदा सेवा प्रभावित भएको छ । 

यहाँका प्रमुख सरुवा भएर गएको महिना दिन भइसक्दासम्म नयाँ प्रमुख हाजिर भएका छैनन् । निमित्तको जिम्मेवारी पाएका नायव सुब्बा सुमन खड्का पनि बिदामा छन् । जिल्ला निर्वाचन कार्यालयमा मतदाता नामावलीमा नयाँ नाम दर्ता गराउन पुगेका नागरिकले हैरानी खेप्नुपरेको छ । नाम दर्ता प्रक्रियाका लागि सूचीकृत हुन पुगेका सर्वसाधारणले घण्टौं कुर्दा पनि सेवा पाएका छैनन् ।

आयोगले मतदाता नामावलीमा नाम दर्ता गर्न दिएको समयसीमा सकिन तीन दिन मात्रै बाँकी छ । कार्यालयले आयोगको सिष्टम नचलेको भन्दै कामलाई गति दिन नसकेको बताउने गरेको फालेलुङ-६ बाट आएका सन्तोष राईले बताए ।