विराटनगर — नेकपा (माओवादी केन्द्र) कोशी प्रदेश संसदीय दलका नेता इन्द्रबहादुर आङ्बोले प्रयोग गर्दै आएको सरकारी गाडीको ठक्करबाट बिहीबार एक जनाको ज्यान गएको छ ।

मोरङको ग्रामथान गाउँपालिका–५ ककडमाडीमा दिउँसो १२:१५ बजे कोशी प्रदेशसभाको को १ झ ६५० नम्बरको स्कोर्पिओ गाडीले मोटरसाइकललाई ठक्कर दिँदा ग्रामगान–५ का ३५ वर्षीय प्रवेश चौधरीको मृत्यु भएको हो । मोरङ प्रहरीकाअनुसार विराटनगरबाट विराटचोकतर्फ जाँदै गरेको गाडीले बाटो क्रस गर्दै गरेको को ९ प ७९ नम्बरको मोटरसाइकललाई ठक्कर दिएको थियो । 

तीव्र गतिमा रहेको गाडीको ठक्करबाट गम्भीर घाइते भएका चौधरीलाई स्थानीयले उद्धार गरी विराट नर्सिङ होम पठाएका थिए । उपचारकै क्रममा दिउँसो ३:१५ बजे चिकित्सकले उनलाई मृत घोषणा गरेका थिए ।