पाँचथर — कात्तिक १३ गतेदेखि अवरुद्ध मेची राजमार्गको इलाम खण्ड अन्तर्गत राजदुवाली खण्डबाट साना सवारी साधनको आवागमन सुरु भएको छ।

सडक डिभिजन इलामले भासिएको सडक मर्मत गरेसँगै यहाँबाट दुई पाङ्ग्रे र हलुका चार पाङ्ग्रे सवारीका साधन आवागमन सुरु भएको हो ।

गत असोज १७ र १८ गतेको अविरल झरीका कारण क्षतिग्रस्त मेची राजमार्गको यो खण्ड सडक डिभिजन इलामले १४ दिनको प्रयत्न पश्चात् सञ्चालनमा ल्याएको थियो । त्यसको १३ दिन पछि पुनः मोन्था चक्रवातको प्रभावका कारण भएको वर्षासँगै सडक भासिन र दबिने समस्याले पट- पटक अवरोध भएको थियो ।

सडक डिभिजन इलामका प्रमुख पवन भट्टराईले सडक सामान्य मर्मतपछि साना साधनका लागि खुल्ला गरिए पनि जोखिम यथावत् रहेकाले सावधानी अपनाएर हिँड्न यात्रु र चालकलाई आग्रह गरेका छन् ।