विराटनगर — मोरङको केराबारी–३, रामपुरकी १४ वर्षीया रुका मगर भाइटीकाको दिनदेखि सम्पर्कविहीन छिन् । परिवारका अनुसार उनले घरमा कसैलाई जानकारी नदिई निस्किएकी थिइन् । आमा लीला माया मगर भन्छिन्, ‘भाइटीकाकै दिन घरबाट निस्किएकी छोरी अझैसम्म फर्किएकी छैन ।’

लक्ष्मीपूजाको साँझ सबैतिर उज्यालोले घरहरू चम्किएका थिए, तर सुनसरी इनरुवा–५ बलाहास्थित पाण्डे परिवारको घरमा अन्धकार पस्यो । १५ वर्षीया भावना पाण्डे भैलो खेल्न भन्दै निस्किएकी थिइन् । त्यस दिनदेखि उनी अझैसम्म घर फर्किएकी छैनन् । जिल्ला प्रहरी कार्यालय सुनसरीका एसपी केशवकुमार थेवेका अनुसार बेपत्ता किशोरीको खोजी तीव्र पारिएको छ । ‘नेपाल र भारत दुवैतिर खोजिरहेका छौं,’ उनले भने, ‘केही दिनमा पत्ता लाग्ने विश्वास छ ।’

एक साताअघि मोरङको उर्लाबारी नगरपालिका–३ मंगलबारेकी १४ वर्षीया आयुषा धिमाल हराएकी थिइन् । मामाघर कानेपोखरी–५, दुम्रीघाटबाट दिउँसो हिँडेकी उनी साँझसम्म घर फर्किनन् । तर शनिबार प्रहरीको टोलीले उनलाई विराटनगर बरगाछीस्थित एक होटलबाट उद्धार गरेको मोरङका प्रहरी प्रमुख एसपी कवित कटुवालले जनाए । ‘होटलमा फेला पारी अभिभावकको जिम्मा लगाइएको छ,’ उनले भने । 

त्यसअघि २१ असोजमा मोरङकै लेटाङ–२ की १३ वर्षीया अंशु गौतम हराएकी थिइन् । पिङ खेल्न भनी घरबाट निस्किएकी उनी हराएको दुई सातापछि शुक्रबार बेलबारी–चिसाङ साझेदारी वनभित्र मृत अवस्थामा फेला परिन् ।