ताप्लेजुङ लेलेपका निमाले सङ्खुवासभाका निमाकै रेकर्ड ब्रेक गरेका हुन्।
ताप्लेजुङ — फक्ताङलुङ गाउँपालिका ६ लेलेप ताप्लेजुङका निमा छिरिङ शेर्पाले १६ वर्ष चार महिना १८ दिनको उमेरमा ८ हजार १ सय ६३ मिटर उचाईको गोरखामा रहेको मनास्लु हिमालको सफल आरोहण गरेका छन् ।
इलाइट ट्रेक्स एण्ड एक्सपिडिसन प्रबन्धक तथा हिमाल आरोहणबाटै गिनिज बुकमा नाम लेखाएका मिङमा डेभिड शेर्पाका अनुसार उनी सबैभन्दा कम उमेरमा मनास्लु हिमाल आरोहण गर्ने किशोर पनि भएका छन् ।
यसअघि सङ्खुवासभाका निमारिञ्जि शेर्पाले १६ वर्ष पाँच महिना १२ दिनको उमेरमा हिमाल आरोहण गरेर रेकर्ड बनाएका थिए । उनको रेकर्ड त्यही नाम राशिका ताप्लेजुङका शेर्पाले ब्रेक गरेको मिङमा बताउँछन् । निमा मिङमाका सहोदर भतिजो पनि हुन् ।
निमा छिरिङले आइतबार बिहान मनास्लुको आरोहण गरेको इलाइट कम्पनीले जनाएको छ ।
मनास्लु हिमाल आरोहण गरेका ताप्लेजुङ लेलेपका निमा छिरिङ शेर्पा । तस्बिर सौजन्य : इलाइट कम्पनी
