ताप्लेजुङ — पर्याप्त पानी नपरेपछि ताप्लेजुङमा ८४.६ प्रतिशतमा मात्रै रोपाइँ भएको छ । गतवर्ष ९८.५ प्रतिशतमा रोपाइँ भएको थियो ।

धानको बिउ तयार पारेर बसेका किसानले समय निकै घर्किंदासम्म पनि बाली लगाउने तयारी गरेका थिए । तर भदौ दोस्रो सातासम्म पनि पानी नभएपछि ब्याडको बिउ काटेर गाईबस्तुलाई दिएका छन् । 

कृषि ज्ञान केन्द्र ताप्लेजुङका कृषि प्रसार अधिकृत विजय श्रेष्ठका अनुसार जिल्लामा ५ हजार ६ सय ६६ हेक्टरमा धानखेती हुने गरेको छ । यस वर्ष ४ हजार ७ सय ९७ हेक्टरमा मात्रै रोपाइँ भयो । धान रोपाइँ नभएको मध्ये पनि ६ प्रतिशत खेत पूरै बाँझो छ । १० प्रतिशतमा कोदो, मकै मास, मस्याम लगायतका बाली लाग्ने कृषि ज्ञान केन्द्रले जानकारी दिएको छ ।