धरान — सुनसरीको झुम्का कारागारमा फेरि दुई जना कैदीबन्दीको मृत्यु भएको छ । धरान उपमहानगरपालिका-१० का २४ वर्षीय सागर राई र सुनसरीको गढी गाउँपालिका-६ बस्ने ४८ वर्षीय रामदेव उराँवको मृत्यु भएको हो ।

उराँव कर्तव्य ज्यान मुद्दामा कैद भुक्तान गरिरहेका थिए । उनलाई अदालतले २५ वर्ष सजाय तोकेकोमा २०७७ सालदेखि कैद सजाय भोगिरहेका थिए । राई लागुऔषध मुद्दामा गत वैशाखदेखि पुर्पक्षका लागि थुनामा थिए ।

दुवै जनामा श्वासप्रश्वासमा समस्या देखिएपछि बीपी कोइराला स्वास्थ्य विज्ञान प्रतिष्ठान धरानमा भर्ना गरिएकोमा उपचारकै क्रममा मृत्यु भएको निमित्त जेलर राम निरौलाले बताए । उनले भने, ‘उनीहरुमा पहिला कुनै समस्या थिएन, अचानक बिरामी भएर बीपी प्रतिष्ठान अस्पताल लग्यौ तर उपचारकै क्रममा मृत्यु हुन पुग्यो ।’ उनका अनुसार उराँवलाई शनिबार राति श्वासप्रश्वासमा समस्या देखिएपछि धरानस्थित बीपी कोइराला स्वास्थ्य विज्ञान प्रतिष्ठान पुर्‍याएकोमा उनको उपचारका क्रममा सोमबार दिउँसो मृत्यु भएको निमित्त जेलर निरौलाले बताए । त्यस्तै अर्का कैदी राईको मंगलबार बिहान मृत्यु भएको जेलर निरौलाले बताए ।