उदयपुर — सरकारले अनुदानमा किसानलाई वितरण गर्न पठाएको २ सय बोरा रासायनिक मल उदयपुरको कटारीस्थित एक व्यापारीको गोदाममा फेला परेको छ । कटारीका व्यापारी दिलिप चौधरीले सञ्चालन गरेको आशुतोष ट्रेडर्स एन्ड जनरल स्टोर्सको गोदाममा लुकाएर राखिएको अवस्थामा जिल्ला प्रशासन कार्यालयको अनुगमन टोलीले बिहीबार मल बरामद गरेको हो ।

फेला परेको मलसहित गोदामलाई तत्काल शिलबन्दी गरेर छानबिन प्रक्रिया अघि बढाइएको सहायक प्रमुख जिल्ला अधिकारी विक्रमप्रसाद पाण्डेयले जानकारी दिए । उनले भने, 'मल कहाँबाट आयो? कस–कसको संलग्नता छ भन्ने विषयमा छानबिन गर्न र आवश्यक कारबाही गर्न कटारी नगरपालिकाका प्रमुख प्रशासकीय अधिकृतलाई निर्देशन दिएका छौं।'

कटारी नगरपालिकाका प्रमुख प्रशासकीय अधिकृत राजन थापाले पनि घटनाबारे छानबिन समिति गठन गरिने र दोषीमाथि कानुनअनुसार कारबाही हुने बताए । जिल्लामा रासायनिक मल अभाव भइरहेका बेला अनुदानमा किसानलाई उपलब्ध गराउनुपर्ने मल व्यापारीको गोदाममा भेटिनु शंकास्पद रहेको स्थानीयवासीहरूको भनाइ छ। किसानहरूले जनप्रतिनिधि र कर्मचारीको मिलेमतोमा व्यापारीहरूले अनुदानको मल कालोबजारी गर्दै आएको आरोप लगाएका छन्।