सुनसरी — इटहरी उपमहानगरपालिकाका पूर्वनगरप्रमुख द्ववारिकलाल चौधरीले नगरप्रमुख हेमकर्ण पौडेलले समयमै बजेट नल्याएर नगरवासीको भविष्यमाथि खेलबाड गरेको बताएका छन् ।

उनले वर्तमान नगरप्रमुख सहितका जनप्रतिनिधि अनियमिततामा संलग्न रहेको आरोप लगाउँदै आफू अनुकूल बजेट पास हुन नसकेपछि नगरपालिकालाई बजेटविहीनताको अवस्थामा पुर्‍याएको दाबी गरे । 

इटहरीका केही पूर्वजनप्रतिनिधि, नागरिक समाज र प्राज्ञिक तथा बौद्धिक वर्गलाई सहभागिता गराएर बुधबार पत्रकार सम्मेलनमार्फत चौधरीले नगरप्रमुख हेमकर्ण पौडेलको असक्षमताले नगरपालिका डुब्न लागेको बताए । नगरप्रमुख पौडेल सहितका जनप्रतिनिधिले नगरवासीप्रति जिम्मेवार नभएको बताउँदै चौधरीले उपमहानगरपालिकालाई कर्मचारी भर्ती केन्द्र बनाएको आरोप लगाए ।

इटहरी उपमहानगरपालिका अपारदर्शी रुपले चलेको बताउँदै जनप्रतिनिधिहरु सार्वजनिक सुनुवाइ नगरी प्रश्नबाट भागेको उनको भनाइ छ । इटहरीमा यसअघि नै सुरुवात भएका योजनाहरुलाई अलपत्र पारेर वर्तमान जनप्रतिनिधि विभिन्न महत्वकांक्षी योजना र खरिद मोहमा लिप्त भएको चौधरीको आरोप छ । तत्कालीन प्रदेश सरकारले समेटेको इटहरीको दीर्घकालीन बाढी नियन्त्रणका लागि बाहिरी चक्रपथ ४२ किलोमिटर रेखांकन भएको योजना कार्यान्वयन नभएकोमा उनले ध्यानाकर्षण भएको जनाएका छन् ।