पाँचथर — मेची राजमार्गको पाँचथर खण्डअन्तर्गत हेवा खोलामा मोडुलर ब्रिज जोड्ने कामलाई तीव्रता दिइएको छ । सडक डिभिजन इलाम र भारतबाट आएका प्राविधिकहरु काममा खटिएका हुन् ।

यसअघि निर्माणाधीन मोडुलर ब्रिज गत जेठ ३१ गते निर्माण सम्पनन नहुँदै भाँचिएको थियो । फिदिम नगरपालिका र हिलिहाङ गाउँपालिकालाई सिमाना छुट्याएर बग्ने हेवा खोला क्षेत्रमा तीन वर्षयता यातायात सेवा प्रभावित हुँदै आएको छ ।

यसपटक भारतबाट लन्चिङ किट्ससहित आएका भारतीय प्राविधिकहरुले सडक डिभिजन इलामको निगरानीमा पुल जडान अघि बढाइएको सडक डिभिजन इलामका प्रमूख पवन भट्टराईले जानकारी दिए । पुल जडान गर्न २१ जना भारतीय प्राविधिक खटेका छन् । ‘अघिल्लो पटक भाँचिदा क्षति पुगेको पुलका अपुरो सामग्रीसँगै जडान गर्ने प्राविधिक र अन्य सामाग्री आइपुगेपछि जडान गर्न थालिएको हो,’ भट्टराईले भने ।

पुल भाँचिदा २० प्रतिशत सामग्री नष्ट भएको थियो । पुलका सामग्री भारत सरकारले निःशुल्क उपलब्ध गराएपछि जडानको अन्तिम चरणमा भाँचिएको थियो ।

यो मोडुलर भारत सरकारले उपलब्ध गराएको हो । जसको लम्बाई ७० मिटर छ । साउन १७ देखि सुरु भएको मोडुलर ब्रिजको जडान कार्य सक्न अब कम्तिमा १० दिन लाग्ने अनुमान छ । जडानमा भारतीय इन्जिनियर र प्राविधिक भारतबाटै आएका छन् ।