संखुवासभा — नागपञ्चमीका दिनदेखि नेवार समुदायको बाहुल्यता रहेको पूर्वका संखुवासभा, भोजपुर, तेह्रथुम, ताप्लेजुङ, धनकुटालगायतका जिल्लामा मंगलबारबाट लाखेनाच सुरु भएको छ । 

नेवार संस्कृति र परम्पराअनुसार भीमसेन मन्दिरमा पूजा र सगुन खुवाएर नागपञ्चमीबाट लाखे निकालिएको छ । संखुवासभामा खाँदबारी र चैनपुरमा रहेको भिमसेन मन्दिरबाट विधिवत् लाखेनाच सुरु गरिएको हो । 

नेवा देय दबु संखुवासभाको नेतृत्वमा सदाझैं खाँदबारी, चैनपुर, सिभुवा, तुम्लिङटारलगायतका व्यापारिक केन्द्रमा लाखेनाच सुरु गरिएको हो । लाखे कृष्णजन्माष्टमीको दिन भिमसेन मन्दिरमा विधिवत रुपमा नाच प्रदर्शन गरेपछि सकिन्छ । यो वर्ष नेवा देय दबुले सूचिकृत गरेरमात्रै लाखे नाच्न दिने व्यवस्था मिलाएको छ ।

संखुवासभामा बसोबास गर्ने नेवार समुदायका समूह र संस्था वा व्यक्तिहरुलाई मात्रै लाखेनाचमा सहभागी हुन आग्रह पनि गरेको छ । खाँदबारी नगर अध्यक्ष पुष्पबहादुर श्रेष्ठका अनुसार लाखे नाच्न अनिवार्य रुपमा नेवा देय दबुमा सूचीकृत हुनुपर्ने छ । 'लाखेनाचमा मादक पदार्थ सेवन गरी हुलहुज्जत गर्न पाइँदैन,' उनले भने, 'यातायातका साधन, पैदलयात्री र घरघरमा गएर जथाभावी रकम असुल्न पाइने छैन ।'