खोटाङ — जन्तेढुंगा गाउँपालिकाले आफैले लगाएको आलुको उत्पादन उठाउन थालेको छ । करिब ६० रोपनी बाँझो बारीलाई खनजोत गरी पालिकाले आलु रोपेको थियो ।

गाउँपालिका अध्यक्ष अरुणादेवी राईका अनुसार वडा नं ४ डम्बर्खुशिवालयस्थित गाउँपालिकाको नाममा रहेको ११ रोपनी र अन्य सार्वजनिक जग्गासहित ६० रोपनी बारीमा लगाएको आलु बिहीबारदेखि खन्न थालिएको हो । कृषिले सिफारिस गरेको तीन क्विन्टल र स्थानीय रैथाने सात मुरी आलुको बिउ रोपिएको थियो । 

६० रोपनी जग्गामध्ये १५ रोपनीजतिमा मकैसहित आलु रोपिएको छ भने बाँकी सबै आलु रोपिएको गाउँपालिका उपाध्यक्ष खेमबहादुर खड्काले बताए । उनका अनुसार आलु खन्न करिब एक साता लाग्नेछ । बिहीबार एकै दिन ३५ केजी जाने २४ बोरा आलु खनिएको छ । ‘आलु खन्न एक साताजति लाग्ने भए पनि कति उत्पादन भयो भन्ने चाहिँ खनिसकेपछि थाहा हुन्छ,’ खड्काले भने, ‘उत्पादित आलु स्थानीय बासिन्दालाई सस्तोमा बिक्री गर्ने योजना बनाइएको छ ।’