ताप्लेजुङ — गत जेठ २२ गते पानी पिउने क्रममा तमोर नदीमा बेपत्ता ११ वर्षकी गंगा शेर्पा र १९ गतेदेखि बेपत्ता ३७ वर्षकी कमला शेर्पाको शव फेला परेको छ । गंगा फुङलिङ नगरपालिका-३ टारबारी र कमला आठराई त्रिवेणी २ फुलबारीकी हुन्।
गंगाको शव तेहृथुम जिल्लाको छथर गाउँपालिका-२ खिरखिरे नावाखोला नजिक र कमलाको पाँचथरको हिलिहाङ गाउँपालिका-२ दुधेपानीमा फेला परेको प्रहरीले जनाएको छ । दुवै ताप्लेजुङबाट बगी गएको अनुमान प्रहरी तथा परिवारको छ ।
गंगा पानी पिउने क्रममा बगेकी थिइन् भने कमला घरबाटै हराइ बेपत्ता भएकी थिइन् । नदीले बगाएको दखेपछि नदी किनारमा गंगाको लगातार खोजी गरिरहँदा फेला परेको जिल्ला प्रहरी कार्यालय ताप्लेजुङका प्रहरी निरीक्षक एवं सुचना अधिकारी विवेक बस्नेतले जानकारी दिए ।
दुवै शव आवश्यक कानुनी प्रक्रिया पूरा गरी परिवारको जिम्मा लगाउने बस्नेतले बताए ।
