काठमाडौँ — लामो समयदेखि सीमा विवाद रहेको सोलुखुम्बु र ओखलढुंगाको बुलबुले क्षेत्रको विवाद समाधान गर्न कार्यदल गठन गरिएको छ । शनिबार दुई जिल्लाका सुरक्षा समिति पदाधिकारीको सल्लेरीमा बसेको अन्तर जिल्ला सुरक्षा समन्वय बैठकले संयुक्त यस्तो निर्णय गरेको हो । 

सोलुखुम्बु र ओखलढुंगाको सिमानामा पर्ने तोलु गुम्बा, बुलबुले, लोमुजे बौद्ध हुँदै छुटाँगाका क्षेत्रमा २०४३ सालदेखि नै सीमा विवाद रहेकामा कुन जिल्लाको हो भनी यकिन गर्न समिति गठन गरिएको हो । उक्त क्षेत्र ओखलढुंगाको खिजिदेम्बा गाउँपालिका या सोलुको सोलुदुधकुण्ड नगरपालिका कहाँ पर्ने भन्ने विषय विवादित छ ।

बैठकले दुवै जिल्लाको मालपोत र नापी कार्यालयका कागजात अध्ययन गरी १५ दिनभित्र प्रतिवेदन पेस गर्ने गरी समिति गठन गरेको सोलुखुम्बुका प्रमुख जिल्ला अधिकारी अनोजकुमार घिमिरेले बताए । समितिमा ओखलढुंगाका सहायक प्रमुख जिल्ला अधिकारी गोमादेवी ढकाल (पौडेल) संयोजक, सोलु र ओखढुंगाका मालपोत र नापी कार्यालयका प्रमुख सदस्य र जिल्ला प्रशासन सोलुका नायब सुब्बा सुमन कार्की सदस्य सचिव रहेका छन् ।