काठमाडौँ — युवालाई श्रमको सम्मान भाव जगाउने उद्देश्यले विराटनगरमा आयोजना गरिएको सीप उत्सव-२०८२ बाट उत्कृष्ट तीनजना स्कील्स् आइकन्स घोषित भएका छन् ।

उत्कृष्ट हुनेमा अटोमोबाइलतर्फ मनमोहन स्मृति पोलिटेक्निकका प्रशिक्षार्थी चन्द्रदेव यादव, होटल म्यानेजमेन्टतर्फ नरबहादुर कर्माचार्य बहुप्राविधिक शिक्षालयका विवश कोइराला र सूचना प्रविधि (आईटी) तर्फ पुष्प धिरेन्द्र स्मृति प्रतिष्ठानकी सोनाम नेम्वाङ छन् । 

औद्योगिक प्रशिक्षार्थी स्किल्स् आइकनका लागि होटल म्यानेजमेन्ट, अटोमोबाइल तथा सूचना प्रविधि (आईटी) क्षेत्रका युवाबीच प्रतिस्पर्धा गराइएको थियो । यसमा कोशी प्रदेशमा प्राविधिक व्यावसायिक शिक्षा र तालिम दिने सात वटा संस्थाबाट छनौट भएका १६ जना प्रतिस्पर्धीमध्येबाट तीन जना प्रशिक्षार्थी उत्कृष्ट भएका हुन् । 

कोशी प्रदेशको सामाजिक विकास मन्त्रालयसितको समन्वयमा उद्योग संगठन मोरङ तथा इन्स्योर परियोजनाले संयुक्त रुपमा आयोजना गरेको सीप उत्सवमा श्रम तथा रोजगारीबारे वृत्ति, परामर्श र विभिन्न पेशाकर्मीका सफलताका कथालगायत लाइभ ट्रेनिङ गराइएको उद्योग संगठन मोरङका महानिर्देशक चुडामणि भट्टराईले बताए ।