सुनसरी — पूर्वी नेपालका जिल्लाहरुबाट गाँजा तस्करीमा भारतीय नम्बर प्लेटको एम्बुलेन्स प्रयोग हुने गरेको पाइएको छ ।

शनिबार राति सुनसरीमा प्रहरीले १ सय ८० किलो गाँजा लोड गरिएको भारतीय नम्बर प्लेटको एम्बुलेन्स नियन्त्रणमा लिएपछि गाँजा तस्करीमा तस्करले नयाँ–नयाँ शैली अपनाउन थालेको जिल्ला प्रहरी कार्यालय सुनसरीले जनाएको छ ।

प्रहरीले रामधुनी नगरपालिका–६ स्थित पिडारी क्षेत्रबाट १ सय ८० किलो लागुऔषध गाँजासहित एक भारतीय नम्बरको एम्बुलेन्स र त्यसका चालकलाई प्रहरीले नियन्त्रणमा लिएको छ ।

शनिबार राति करिब १० बजे लागुऔषध गाँजा बोकेर जाँदै गरेको भन्ने गोप्य सूचनाको आधारमा इलाका प्रहरी कार्यालय इटहरी, पकली र प्रस्तावित इलाका प्रहरी कार्यालय रामधुनीबाट खटिएको संयुक्त प्रहरी टोलीले सो क्षेत्रको सम्पूर्ण सडक ब्लक गर्दै चेकजाँच गरेको थियो ।