विराटनगर — आन्दोलनबाट घर फर्किइरहेका शिक्षक चढेको बस शनिबार बिहान झापाको शिवसताक्षी नगरपालिका-९ स्थित दुधे मिलन चौकमा पल्टिँदा २१ जना घाइते भएका छन् । तीमध्ये १३ जना शिक्षक रहेका छन् ।

जिल्ला प्रहरी कार्यालय झापाका अनुसार काठमाडौंबाट काँकडभिट्टातर्फ जाँदै गरेको यात्रुबाहक बस अनियन्त्रित भइ पल्टिएको थियो । दुर्घटनाका सबै घाइतेको अवस्था सामान्य रहेको प्रहरीले जनाएको छ ।

प्रदेश १-०१-००१ ख ४२३५ नम्बरको रात्रिबस बिहान करिब साढे ५ बजेतिर पूर्व-पश्चिम राजमार्गमा अनियन्त्रित भएर पल्टिएको थियो । घाइते भएकाहरूलाई उपचारका लागि बिर्तामोडस्थित बिएण्डसी अस्पताल र बिर्तासिटी अस्पतालमा भर्ना गरिएको छ ।

इलाका प्रहरी कार्यालय झिलझिलेका अनुसार बिएण्डसी अस्पतालमा ९ जना र बिर्तासिटी अस्पतालमा १२ जना घाइतेको उपचार भइरहेको छ । अधिकांश घाइतेहरूलाई टाउको र हात-खुट्टामा चोटपटक लागेको छ ।