खोटाङ — बाराहापोखरी गाउँपालिकामा बसाइँ सरेर आउनेलाई एक लाख रुपैयाँ प्रदान गरिएको छ ।
सप्तरीको सप्तकोसी नगरपालिका बलार्दहबाट बाराहापोखरी–६ मौवाबोटे बसाइँ सरेर आउने वेदबहादुर खड्कालाई बिहीबार एक लाखको चेक प्रदान गरिएको हो । गाउँपालिका अध्यक्ष सालिकराम बन्जराका अनुसार एक लाखको चेकसहित स्वागत गरिएको छ ।
२०६३ मा बसाइँ सरेर गएका खड्कासहित ४ जनाका परिवार छ महिनाअघि बसाइँ सरेर फर्किएपछि स्वागत गरिएको बन्जराले बताए । बसाइँ सरेर आउने जोकोहिलाई एक लाख रूपैयाँ दिने गाउँपालिकाको निर्णयअनुसार खड्कालाई प्रदान गरिएको बन्जराको भनाइ छ ।
‘बसाइँ सरेर डकुमेन्टसहित आएकालाई नगद एक लाख पुरस्कार दिने निर्णय छ,’ बन्जराले भने, ‘त्यसैअनुसार एक लाख रूपैयाँको चेकसहित स्वागत गरिएको हो ।’
