पाँचथर — चौंरीपालक किसान लक्षित कार्यक्रम गर्दै पाँचथरको फालेलुङमा आयोजित आठौं फालेलुङ चौंरी पर्यटन महोत्सव सकिएको छ ।
चैत ३१ मा सुरु महोत्सव मंगलबार सकिएको हो । महोत्सवको अवसरमा फालेलुङमा पहिलोपटक चौंरी पालन व्यवसाय सुरु गरेका देवीप्रसाद नेपाल र तेञ्जिङ भोटियालाई सम्मान गरिएको थियो । अरू तीन किसानसमेत पुरस्कृत भएका छन् ।
नेपाल र भोटियालाई चौंरी पर्यापर्यटन महोत्सव उद्घाटन समारोहमा कोशी प्रदेशका पर्यटन वन तथा वातावरणमन्त्री सदानन्द मण्डल र सांसद मैया श्रेष्ठ लावती लगायतले दोसल्ला र कदर पत्रमार्फत सम्मान गरे । उत्कृष्ट चौंरीपालकका रूपमा शर्मिला राई, रङ्गम मगर र फिपराज केरुङ पुरस्कृत भएका छन् । उनीहरुलाई नगद र प्रशंसापत्र मार्फत पुरस्कृत गरियो ।
महोत्सवमा चौंरीपालक व्यवसायीबीच फुटबल र डोरी तान्ने प्रतियोगिता समेत गरिएको छ । याक डान्ससहित नेपाली मौलिक संस्कृतिमा आधारित सांस्कृतिक कार्यक्रम पनि आयोजना गरियो ।
गाउँपालिका मुख्य प्रवर्तक रहेको आठौं फालेलुङ चौंरी पर्यटन महोत्सवको आयोजना फालेलुङ कञ्चनजंघा पर्यापर्यटन संस्था र दीपज्योति युवा क्लब लगायतले आयोजना गरेका हुन । २०७३ सालदेखि महोत्सव हुँदै आएको छ ।
