ताप्लेजुङ — पाथीभरा क्षेत्र विकास समितिले मन्दिर क्षेत्रमा मकुम्लुङ (ढुंगा) र यग्राङसिं (फलामको नौ तले भर्याङ) गाड्नेले तीन दिनभित्र कार्यालयको सम्पर्कमा आउन निर्देशन दिएको छ ।
तीन दिनभित्र सम्पर्कमा नआए उक्त संरचना क्षेत्र विकास समितिले हटाउने कार्यकारी निर्देशक प्रजिन हाङबाङले शुक्रबार विज्ञप्तिमार्फत चेतावनी दिएका छन् । सरकारले विकास समिति ऐन १३ बमोजिम पाथीभरा क्षेत्रको संरक्षण, संवर्द्धन र प्रवर्द्धन गर्न समिति गठन गरेको स्मरण गराउँदै उनले समितिको स्वीकृतिबिना यस्ता कार्य गरिएको प्रति असन्तुष्टि जनाएका छन् ।
समितिको निर्णयअनुसार मुख्य प्रवेशद्वार भित्रका क्षेत्रमा रहेका मानवनिर्मित संरचना निर्माण नगर्ने, भएको हटाउने र वृक्षरोपण गरी हटाउने निर्णय भएको र त्यहीअनुसार काम भइरहेको दाबी गरिएको छ । परिसरभित्र किरात धर्मगुरु एवं राष्ट्रिय विभूति फाल्गुनन्दको सालिक पनि रहेको छ । समितिले संघ, संस्था व्यक्तिबाट निर्माण भएका संरचना १५ दिन भित्रमा हटाउन वा व्यवस्थापन गर्न कार्यालयमा सम्पर्क राख्न पनि अनुरोध गरेको छ ।
पछिल्लो समय मकुम्लुङ र यग्राङसिं कसले राख्यो भन्ने नखुलेको क्षेत्र विकास समितिका कर्मचारीको भनाइ छ । ‘बेलुका सुत्दा थिएन, बिहान उठ्दा गाडिराखेको थियो,’ पाथीभरा क्षेत्र विकास समितिका कर्मचारीले भने, ‘यसरी राख्नेको खोजी र हटाउने प्रयोजनका लागि सूचना निकालेका हौं ।’
भौतिक पूर्वाधार मन्त्रालयको सहभागितामा पाथीभराको गुरुयोजना बनाए पनि यसलाई समितिले कार्यान्वयनमा ल्याउन सकेको छैन । चैत ६ गते राति गाडेको संरचना हटाउन क्षेत्र विकास समितिले ८ गते विज्ञप्ति निकालेको छ ।
