खोटाङ — आगामी वैशाख १ मा रेडपाण्डा तथा थार महोत्सव हुने भएको छ । मुन्दुम ट्रेल भ्रमण वर्ष २०२५ को अवसरमा दिक्तेल रूपाकोट मझुवागढी नगरपालिकाले महोत्सव आयोजना गर्ने भएको हो ।

दिक्तेल रूपाकोट मझुवागढी नगरपालिकाका प्रमुख तीर्थराज भट्टराईले वैशाख १ गते हुर्लुङमा विभिन्न जातजातिको संस्कार संस्कृतिअनुसारका खानपान, भेषभूषा प्रस्तुति गरिने बताए । ‘अभिनेता दयाहाङ राईको प्रमुख आतिथ्यमा रेडपाण्डा तथा थार महोत्सव हुनेछ,’  बिहीबार आयोजित पत्रकार सम्मेलनमा उनले भने, ‘यसका साथै रेडपाण्डा–थार ट्रेल पनि सुरु गरिनेछ ।’ 

भट्टराईका अनुसार हुर्लुङदेखि रूपाकोट हुँदै बगरेभन्ज्याङ, सिर्धन चौतारो, सिकुरी भन्ज्याङ, लहरे माने, बानियाँपाटी, साप्सुढाप, मेरुङ तीन थुम्कीबाट मुन्दुम ट्रेल जोड्ने पदमार्गलाई रेडपाण्डा–थार ट्रेलका रूपमा सुरु गरिनेछ ।