खोटाङ — खोटाङ–दिक्तेल रुपाकोट मझुवागढी नगरपालिका–१० पाथेकामा लोपोन्मुख रेडपाण्डा फेला परेपछि खुसीयाली छाएको छ । दिक्तेल रुपाकोट मझुवागढी नगरपालिकाको टोलीले सोमबार बिहान फेला पारेपछि खुसीयाली छाएको हो ।
आगामी वैशाख १ गते दिक्तेल रुपाकोट मझुवागढी नगरपालिकाले आयोजना गर्ने रेडपाण्डा तथा थार महोत्सवका लागि प्रचार प्रसार गर्न फोटो तथा भिडिओ खिच्न गएको टोलीले फेला पारेको हो । चैत १ गतेदेखि कोप्चे र मेरुङ सामुदायिक वनमा खोजी गर्दा मेरुङ र कोप्चे सामुदायिक वनको सिमानामा सोमबार बिहान ८ बजेर ४० मिनेटमा दुई हजार सात सय ८१ मिटरको उचाइमा फेला पारिएको मेरुङ सामुदायिक वन उपभोक्ता समूहका अध्यक्ष पलमसिं राईले बताए ।
विभिन्न समूह विभाजन गरी रेडपाण्डा खोजी गरिएको थियो । यसमध्ये दिक्तेल रुपाकोट मझुवागढी नगरपालिका–८ बुवालुङका प्रचण्ड राईले सुरुमा देखेका हुन् । त्यसपछि फोटो तथा भिडिओहरू खिचिएका छन् । उक्त रेडपाण्डा करिब अढाई वर्षको भाले भएको स्थानीय तथा मेरुङ सामुदायिक वनका रेडपाण्डा हेरालु पुष्पलाल गिरीले बताए । मेरुङ सामुदायिक वनमा पाँच वटा रेडपाण्डा हुन सक्ने गिरीको भनाइ छ । ‘यो क्षेत्रमा करिब पाँच वटा रेडपाण्डा हुनसक्छ भन्ने अनुमान गरिएको छ,’ गिरीले भने ।
कोप्चे सामुदायिक वन क्षेत्रमा पनि रेडपाण्डा पाइने रेडपाण्डा हेरालु दिनेश गिरीले बताए । तर कति छन् भन्ने यकिन नभएको गिरीले सुनाए ।
रेडपाण्डाको खोजीका लागि वडाध्यक्ष राई सहित वडा नं १० का वडाध्यक्ष मुगाधन राई, १२ का वडाध्यक्ष दानबहादुर राई, नगरपालिकाका लेखा अधिकृत राजकुमार राई, शुभम् फाउन्डेसनका निर्देशक सूर्यबहादुर राई लगायत २८ जनाको समूह चैत १ गतेदेखि खटिएको थियो ।
