ताप्लेजुङ — २१.९३ मेगावाट क्षमताको काबेली ३ जलविद्युत् परियोजनाबाट चैत पहिलो साताभित्रै उत्पादन सुरु हुने भएको छ । सिरिजङ्गा गाउँपालिकामा उत्पादन गर्न लागिएको विद्युत् निर्माणको काम अन्तिम चरणमा पुगेको आयोजनाले जनाएको छ । 

आयोजनाका जनसम्पर्क अधिकृत मेघनाथ ढुंगानाले निर्माणको काम अन्तिम चरणमा पुगेको बताए  ।'आउँदो चैत पहिलो साता सम्ममा विद्युत् सुरु गर्ने तयारीमा छौं,’ उनले भने । यसको निर्माण काबेली हाइड्रोपावर कम्पनी लिमिटेडले गर्दै आएको छ । 

चैत मसान्तभित्र सम्पन्न गर्नेगरी २०७९ माघदेखि काम सुरु भएको थियो । सिरिजङ्गा-५ पेदाङ, वडा नम्वर ६ मामाङखे र वडा नम्वर ७ खेबाङमा आयोजनास्थल रहेको छ । मामाङखे र खेबाङको सिमाना भएर वहने ओथम्मा गहिरी मुहानदेखि ५.१२८ किलोमिटर सुरुङमार्फत विद्युत् गृहमा पुर्‍याइएको छ । यहाँ उत्पादित विद्युत् नेपाल विद्युत् प्राधिकरणको १३२ केभीए अमरपुर सबस्टेसनमा जडान गरिन्छ । यो पाँचथरको हिलिहाङ गाउँपालिकामा रहेको छ ।