पाँचथर — स्वास्थ्य तथा जनसंख्यामन्त्री प्रदिप पौडेलले ग्रामीण तहसम्म सञ्चालनमा रहेका स्वास्थ्य संस्थाको सवलीकरण र दिगो सञ्चालनका लागि तीनै तहका सरकारका बीचमा साझेदारी हुनुपर्ने बताएका छन् । 

पाँचथरको फालेलुङ गाउँपालिका-३ मा निर्मित पाँच शैय्याको अस्पताल उद्घाटनपछि आयोजित कार्यक्रममा सम्बोधन गर्दै मन्त्री पौडेलले यस्तो बताएका हुन् । मन्त्री पौडेलले गाउँ-गाउँमा स्वास्थ्य संस्थाहरू भएपनि स्वास्थ्यकर्मी नबस्ने गुनासो आइरहेको भन्दै त्यसको सम्बोधनका लागि तीनै तहका सरकारले पहल गर्नुपर्ने बताए । 

'ग्रामीण तहसम्म स्वास्थ्य संस्था र विकासका पूर्वाधार निर्माण भइरहेपनि त्यहाँ डाक्टर र नर्स बस्दैनन्, त्यसले बसाइ सर्नेको संख्या दैनन्दिन बढिरहेको छ । घरदैलो नजिकैका स्वास्थ्य संस्थाको सवलीकरण र दिगो सञ्चालनका लागि संघीय सरकारले डाक्टर र केही उपकरण उपलव्ध गराउँछन्, अस्पताल चलाउन डाक्टर एक्लैले सक्दैनन्, डाक्टरसँग-सँगै नर्स र अरु स्वास्थ्यकर्मी चाहिन्छ, प्रदेश र स्थानीय तहले त्यो व्यवस्थापन गर्ने हो भने नागरिकले सामान्य उपचारका लागि बसाइँ सर्नुपर्ने अवस्थाको अन्त्य हुन्छ,' मन्त्री पौडेलले भने ।