पाँचथर — पाँचथरमा विद्यार्थी बोक्ने गाडी दुर्घटना हुँदा एक जनाको मृत्यु भएको छ । दुई जना घाइते भएका छन् ।
हिलिहाङ गाउँपालिका–१ अमरपुरको माङसेवा बोर्डिङ स्कुलका विद्यार्थीलाई घर पुर्याएर अमरपुर बजार फर्किँदै गरेको मे १ ज ३०७३ नम्बरको बलेरो बुधबार साँझ अमरपुर नजिक दुर्घटनामा परेको थियो ।
उक्त दुर्घटनामा गम्भीर घाइते भएका हिलिहाङ–१ का ३५ वर्षीय हेमराज योगीको निधन भएको जिल्ला प्रहरी कार्यालय पाँचथरले जनाएको छ ।
गम्भीर अवस्थामा उद्धार गरिएका उनलाई उपचारका लागि पाँचथर अस्पताल पुर्याइएको थियो । अस्पताल पुग्नासाथ चिकित्सकले योगीलाई मृत घोषणा गरेका थिए ।
योगीको शव पोष्टमार्टमका लागि पाँचथर अस्पतालको शव गृहमा राखिएको छ । दुर्घटनामा हिलिहाङ–१ का २६ वर्षीय बिनोद तामाङ र २० वर्षीय मनिष लिङ्देन घाइते भएका छन ।
उनीहरुमध्ये तामाङको अवस्था गम्भीर रहेकाले विर्तामोड स्थित बी एण्ड सी अस्पताल लगिएको प्रहरीले जनाएको छ । बोलेरोका चालक १९ वर्षीय समिर खातीलाई प्रहरीले नियन्त्रणमा लिएको छ ।
बोलेरो अनियन्त्रित भएर सडकभन्दा एकसय मिटर तल खसेको प्रहरी नायब उपरीक्षक कौशलकुमार बुडाथोकीले जनाए ।
